December 22, 2021
Երեքշաբթի, 21 Դեկտեմբերի յետմիջօրէին, Գանատայի Արտաքին Գործերու Նախարարուհի Մելանի Ժոլին առցանց հանդիպում մը ունեցաւ հայ համայնքի ներկայացուցիչներուն հետ, որուն մաս կազմեց Հայկական Բարեգործական Ընդհանուր Միութեան ՀԲԸՄ Գանատայի Մարմինը:
Հանդիպման ընթացքին հանգամանօրէն քննարկուեցան Գանատա-Հայաստան երկկողմ յարաբերութիւններուն որակական նոր թափ հաղորդելու հրամայականը, Արցախեան հիմնահարցի կարեւորագոյն հանգամանքները (Գերիներու վերադարձ, Կարգավիճակ, ԵԱՀԿ ձեւաչափ), ինչպէս նաեւ՝ տարածաշրջանէն ներս Գանատական դիւանագիտութեան հաւանական դերին եւ գործօն ներկայութեան առնչուող պատկերացումներ:
Նախարար Ժոլին բարձր գնահատեց գանատահայութեան ունեցած դերակատարութիւնը եւ յոյս յայտնեց միասնական ճիգերով ամրապնդելու Գանատա-Հայաստան բարեկամութիւնը: Ապա, շնորհակալութիւն յայտնեց՝ բոլորի մասնակցութեան եւ շահեկան զրոյցի համար: